काठमाडौं, माघ १० आईसबर्ग मध्युपर युथ एशोशियसन बी डिभिजनमा घटुवा भएको छ । ए डिभिजन लिगमा उक्लिएको पहिलो वर्षमै भक्तपुरे क्लब आइसबर्ग मध्यपुर रेलिगेशनमा परेको हो । आफ्नो अन्तिम खेलमा बुधवार यति हिमालयन शेर्पा क्लबसँग १–० ले पराजित भएपछि यस सिजनमा मध्यपुर बी डिभिजनमा घटुवा हुने तेस्रो तथा अन्तिम टोली बनेको हो । त्रिपुरेश्वर स्थित दशरथ रंगशालामा भएको बुधबारको पहिलो खेलमा हिमालयन शेर्पालाई जिताउन गणेश खड्काले खेलको ५२ औं मिनेटमा निर्णायक गोल गरे । यो नतिजापछि जाउलाखेललाई भने राहत भएको छ । मध्यपुरले हार ब्यहोरेपछि सामसुङ जावलाखेल युथ क्लब भने रेलिगेशनवाट जोगिएको छ । पुलिस विरुद्ध हुने आफ्नो अन्तिम खेल हारेपनि जावलाखेल अब रेलिगेशनमा पर्नेछैन । मध्यपुरले लिगका १५ खेलबाट जम्मा १३ अंक मात्रै जोड्न सक्यो । एक खेल कम खेलेको जावलाखेल १४ अंकका साथ रेलिगेशनबाट जोगिन संघर्षरत थियो । जावलाखेल पोखरामा जारी आहा रारा गोल्डकपमा पनि उद्घाटन खेलमा धरान एफसीलाई हराउँदै क्वार्टरफाईनलमा प्रवेश गरिसकेको छ ।
एनसेल कपमा उत्कृष्ट प्रदर्शन गरेको मध्यपुरले लिगको पहिलो खेलमै डिफेन्डिङ च्याम्पियन नेपाल पुलिस क्लबसंग बराबरी खेल्दै लिगको उत्साहजनक सुरुवात गरे पनि त्यसलाई कायम राख्न सकेन । जीतपछि हिमालयन शेर्पा भने २२ अंकका साथ लिग तालिकाको ९ औँ स्थानमा उक्लिएको छ । यसअघि महिन्द्रा बाँसबारी क्लब र बौद्ध क्लब बी डिभिजनमा घटुवा भईसकेका छन् ।यसैबीच, रेफ्रीको निर्णयप्रति असन्तुष्टि जनाउँदै मध्यपुर युथ एशोसिएसनका पदाधिकारी र सर्मथकले रंगशालामै विरोध जनाउँदा स्थिति निकै तनावपूर्ण बनेको थियो । निराजन रायमाझी वान भर्सेज वानमा रहेको अवस्थामा हिमालयनका खेलाडीले लडाउँदा पनि रेफ्रीले पेनाल्टी नदिएको भन्दै उनीहरुले खेलको अन्त्यतिर रेफ्रीविरुद्ध नाराबाजी गरेका थिए । मध्यपुरका अफिसियलले निकै आक्रोशित हुँदै रंगशालामा मेच टेबल फाल्न थालेपछि स्थितिलाई नियन्त्रणमा लिन प्रहरी परिचालन नै गर्नुपरेको थियो भने मध्यपुरका प्रशिक्षक उपेन्द्रमान सिंह समेत प्रहरीको नियन्त्रणमा रहनुपरेको थियो । एन्फाको अनुशासन समितिले यो घटनाको कस्तो निर्णय गर्छ भन्ने कौतुहलता पनि फूटबलप्रेमीहरुलाई परेको छ ।
No comments:
Post a Comment