उपनियोग प्रमुख घिमिरे फर्किए

दोहा– कुटनीतिक सेवाको सहसचिवमा बढुवा भएका दोहास्थित नेपाली दूतावासका उपनियोग प्रमुख ऋषिराम घिमिरे गत विहिवार स्वदेश फर्केका छन् । उनी अव परराष्ट्र मन्त्रालयमा हाजिर हुँदैछन् भने मिनिष्टर काउन्सिलरकारुपमा कार्यरत घिमिरे फर्केपछि दोहा नियोगमा पद रिक्त भएको छ ।

कुटनीतिक सेवामा कार्यरत कर्मचारीहरू विदेशमा रहँदाको अवस्थामा बढुवा भएपछि मुलुक फर्कने र अर्को पोष्टिङको प्रतिक्षामा रहने प्रचलित अभ्यास रहेको छ । प्रचलित ऐन बमोजिम परराष्ट्र मन्त्रालय (कुटनीतिक सेवा) को सहसचिव भएपछि राजदूत बन्नका लागि अवसर खुल्ला हुन्छ । यात कुटनीतिक सेवाको सहसचिव वा राजनीतिक सिफारिसबाट राजदुतहरू नियुक्त गरिन्छन् ।

दुतावासले गत विहिवार उनलाई विदाई गरेको छ । मृदुभाषी र अन्तर्मुखी स्वभावका घिमिरे दोहा नियोगका अनुभवी कर्मचारीकारुपमा सम्मानीत थिए । ‘कतार अनुभव मिठो रह्यो, सक्दो प्रयास गरिएकै हो र भविश्यमा पनि यहाँका नेपालीका पक्षमा आफ्नो सत्प्रयास जारी नै राख्नेछु’ घिमिरेले भने । उनी बढुवाका कारण कतारमा १ बर्षपनि बसेनन् । अव केहि समयभित्रै दुतावासका द्वित्तिय सचिव जय बहादुर राई पनि मुलुक फर्कँदैछन् । उनी भने आफ्नो कार्यकाल सम्पन्न गर्दै मुलुक फर्कने भएका हुन् ।